Buenos-Ayres shahrida III yozgi o‘smirlar Olimpiya o‘yinlari davom ettirilmoqda. Biroz avval hamyurtlarimiz tomonidan yana bir oltin medal qo‘lga kiritildi.

Baydarka va kanoe bo‘yicha qizlar o‘rtasidagi yakkama-yakka bahslarda ishtirok etgan Gulbahor Fayziyeva terma jamoamiz uchun muhim bo‘lgan oltin medallarga ega chiqdi. Hamyurtimiz musobaqa davomida Yangi Zelandiya, Belorus, Qozog‘iston vakilalaridan ustun kelib, finalgacha yetib bordi. Hal qiluvchi chiqishda esa vengriyalik sportchini mag‘lubiyatga uchratdi va oltin medal sohibasiga aylandi.

Bu O‘zbekiston sport delegasiyasining Argentinadagi to‘qqizinchi medalidir. Hamyurtlarimiz hisobida 3 ta oltin, 3 ta kumush va 3 ta bronza medallari mavjud. 1 ta oltin va 1 ta bronza medallari mikst bahslarida qo‘lga kiritilgan.