2018 yilgi mamlakat milliy chempionatini "Metallurg" o‘z uyida Namanganning "Navbahor" jamoasiga qarshi uchrashuv bilan boshlaydi. Mazkur jamoalar bugungacha kuchlilar safida 43 marta to‘qnash kelishgan.

Bugungacha ortda qolgan o‘yinlarning 11 tasida hamshaharlarimiz g‘alaba qozonishgan. O‘n ikkita o‘yinda kuchlar teng kelgan bo‘lsa, 20 bahsda namanganliklarning yutug‘i bilan yakunlangan. Kiritilgan va o‘tkazib yuborilgan to‘plar nisbatidagi farq raqiblarimiz foydasiga – 45:65. Ushbu jamoalarning o‘zaro qarama-qarshiliklaridagi eng yirik hisob 2003 yili qayd etilgan. O‘shanda jamoamiz «Navbahor»ga  0:7 hisobida imkoniyatni boy berib qo‘ygan. Bu bekobodliklarning oliy liga bahslaridagi ham eng yirik mag‘lubiyati hisoblanadi. Ikki mavsum muqaddam “Metallurg” “Navbahor”ni 5:1 hisobida dog‘da qoldirib, bu jamoalar to‘qnashuvidagi yirik g‘alabasini rasmiylashtirdi. Ungacha bekobodliklar “Navbahor”ni muqaddam uchta to‘p farqi bilan yutgandi.

Navbahorchilardan mazkur to‘qnashuvlarda eng ko‘p muvaffaqiyatga erishgan futbolchi Shuhrat Mirxoldirshoyev sanaladi. U bekobodliklar darvozasiga 12 ta to‘p kiritgan. “Metallurg” jamoasidan esa Zohid Abdullayev raqiblari darvozasini 7 marta ishg‘ol etgan.

Bu yilgi mavsumda jamoalar uch marta to‘qnash kelishdi. Ulardan ikkitasida hisob ochilmagan bo‘lsa, yana bittasida namanganliklar zafar quchishgan. Bekoboddagi o‘yin 2018 yil hisobidan to‘rtinchi bahs bo‘ladi.

Jamoalarning Bekobodda o‘tkazilgan so‘nggi olti uchrashuvi:

2018  “Metallurg” – “Navbahor” – 0:0

2017  “Metallurg” – “Navbahor” – 0:0

2016  “Metallurg” – “Navbahor” – 5:1

2015  “Metallurg” – “Navbahor” – 2:3

2014  “Metallurg” – “Navbahor” – 2:0

2013  “Metallurg” – “Navbahor” – 2:1