Xabaringiz bor, shu kunlarda Respublikamiz bo‘ylab «Olimpiya harakati» spartakiadasining viloyat bosqichi o‘tkazilmoqda.
Bungacha Namangan va Xorazm viloyatida ushbu sport musobaqalari yakunlangani haqida xabar berib o‘tgandik.
Qiziqarli musobaqalarning navbatdagisi Qashqadaryo viloyatida tashkil qilindi. Milliy olimpiya qo‘mitasi hamda Qashqadaryo viloyati hokimligi hamkorligida o‘tkazilgan musobaqalarda 23 yoshgacha bo‘lgan sportchilar ishtirok etishdi.
Ular boks, dzyudo, sport kurashlari, taekvondo, karate, yengil atletika bo‘yicha o‘zaro kurash olib bordilar. Musobaqada kuchli uchlikka kira olgan sportchilar diplom va qimmatbaho sovg‘alarga ega bo‘ldilar. G‘oliblar endi dekabr oyida Toshkent shahri mezbonlik qiladigan Respublika bosqichida ishtirok etadilar.
Poytaxtimiz Toshkentda esa «Olimpiya harakati» spartakiadasi o‘zining eng qizg‘in pallasiga kirgan. Hozircha dzyudo bo‘yicha bellashuvlar nihoyasiga yetdi. Oldinda yana bir necha sport turlari bo‘yicha bahslar kutib turibdi.
Qayd etish lozimki, ushbu spartakiada yangi nomlarni saralab olish maqsadida tashkil etilmoqda. Musobaqada o‘zini ko‘rsata olgan sportchilarda keyinchalik terma jamoa safidan o‘rin olish imkoniyati paydo bo‘ladi.
(Qashqadaryo viloyatida o‘tkazilgan musobaqalardan olingan surat)
