Rossiyalik aralash yakka kurash sportchisi Habib Nurmuhamedov amerikalik bokschi Floyd Meyvezer bilan eang qilish uchun UFC bilan shartnomasini davom ettirmaydi. Bu haqda “Fightnews.info” xabar berdi.
Ayni vaqtda Nurmuhamedovning UFC bilan shartnomasi amalda. Ammo bu kelishuv bitta jangdan keyin yakunlanadi. Shundan so‘ng, Habib Meyvezer vakillari bilan muzokaralarni boshlamoqchi.
UFC prezidenti Dana Uayt rossiyalik Floyd bilan boks qoidalariga ko‘ra jang qilishiga qarshi. U ikki sportchi kurashi oktagonda bo‘lishi kerakligi tarafdori.
“Habib Dana Uaytning qarorini hurmat qiladi va UFC bilan shartnomasi bor vaqtda unga amal qiladi. Biroq kelishuv yakunlangach, Nurmuhamedov Meyvezer jamoasi bilan bog‘lanib, u bilan 2019 yil bo‘lib o‘tadigan jangni muhokama qilishga tayyor. Agar Floyd MMA qoidalari bo‘yicha jang qilmoqchi bo‘lsa, yaxshisi o‘zini sug‘urta qildirsin. Axir, bu jangdan keyin u odatdagidek yurolmay qoladi va suvni ham cho‘p bilan ichadi”, degan sportchining menejeri Ali Abdul-Aziz.
Eslatib o‘tamiz, Nurmuhamedov va Meyvezer jangi borasida har ikki sportchi turli fikr bildirgan. Amerikalik jang Los-Anjelesda o‘tishi kerakligini aytsa, rossiyalik u bilan “Lujniki” stadionida jang qilish istagi borligini ma’lum qilgan.
