Xabaringiz bor, shu kunlarda Milliy olimpiya qo‘mitasida mamlakatimizdagi sport federasiya va assosiasiyalari bilan yig‘ilishlar tashkil qilinmoqda. Bungacha yengil atletika, boks, dzyudo, og‘ir atletika, gimnastika, suv sporti, gandbol, basketbol kabi sport federasiyalari vakillari bilan Tokio 2020 Olimpiadasi uchun ishlab chiqilgan strategiya muhokama qilindi.
Milliy olimpiya qo‘mitasidagi navbatdagi uchrashuv O‘zbekiston qilichbozlik federasiyasi vakillari bilan o‘tkazildi. Sir emaski, qilichbozlik sport turida Olimpiya o‘yinlariga lisenziya qo‘lga kiritish oson bo‘lmagan vazifalardan biri hisoblanadi. Ammo, Tokio Olimpiadasi uchun maqsadlar jiddiy. O‘tkazilgan yig‘ilishda qilichbozlarimizning tayyorgarlik rejalari, xorijiy yetakchi mamlakatlar tajribasini sinab ko‘rish, o‘quv-mashg‘ulot yig‘inlarini o‘tkazish va boshqa masalalar muhokama qilindi. Olimpiya o‘yinlariga lisenziya beruvchi turnirlar haqida ma’lumot berildi. Shuningdek, ishchi guruh tomonidan qilichbozlarimizning bungacha o‘tkazilgan musobaqalardagi natijalari tahlil qilindi.
