PEPSI Superligasi 31-turining markaziy bellashuvi “Lokomotiv” o‘yingohida bo‘lib o‘tadi.

Unda O‘zbekistonning 2 karra chempioni – Toshkentning “Lokomotiv” jamoasi “Paxtakor” klubini mehmon qiladi.  O‘yin soat 18:00da start oladi.

Shu o‘rinda ushbu ikki jamoaning o‘zaro uchrashuvlari tarixiga e’tibor qaratadigan bo‘lsak,  “Lokomotiv” shu paytga qadar “Paxtakor”ga qarshi 29ta bahs o‘tkazgan.  O‘zaro o‘yinlarda katta ustunlik “sherlar” tomonida. “Lokomotiv” ushbu jamoani umumiy 5 marta mag‘lub etgan. “Paxtakor” “Loko”ni 17 marta dog‘da qoldirgan bo‘lsa, qolgan 7 o‘yin durang bilan yakun topgan.

“Loko” futbolchilari ushbu raqib darvozasini hozirgacha 27 marta ishg‘ol etishga muvaffaq bo‘lishgan.  Darvozamizdan esa 60 bor to‘p o‘tkazib yuborganmiz.

“Lokomotiv”ning “Paxtakor” ustidan qozongan eng yirik hisobdagi g‘alabasi ushbu mavsum raqibimiz maydonida qayd etildi – 3:1.

“Temiryo‘lchilar” o‘z maydonida “Paxtakor” bilan o‘tgan 14 bahsning 2tasida g‘alaba qozongan bo‘lsa, 8 marta mag‘lubiyatga uchragan. “Lokomotiv” o‘z maydonida “sherlar” bilan 4 marta durang o‘ynagan.

O‘tgan bosqichda “Lokomotiv” mezbonligida kechgan bahs 0:0 hisobida yakunlangandi. “Paxtakor” maydonida o‘tgan o‘yinlarda 1:1 va 1:3 hisobi qayd etildi.

Fakt: “Lokomotiv” ikkinchi bosqichda mag‘lub bo‘lmagan yagona jamoa bo‘lib turibdi.

“Lokomotiv” milliy chempionat doirasida o‘z maydonida o‘tgan so‘nggi 19 bahsda yutqazmadi.

“Paxtakor” bu mavsum safarda o‘tgan so‘nggi 10 o‘yinning 6tasida g‘alabaga erishgan.