«Pari Sen-Jermen» sport direktori Antero Enrike yarim himoyachi Adriyen Rabyoning onasi Veronik Rabyoning so‘zlariga izoh berib o‘tdi. Futbolchining onasi yozda "Barselona" Adriyenning transferi borasida taklif yuborgani, ammo parijliklar uni sotmagani haqida aytib o‘tgandi.

«Veronik Rabyo fikrlari meni hayron qoldirdi. Uning aytishicha, biz yozda Adriyennning transferi borasida "Barselona"dan taklif olganmiz. Ha, bu haqiqat. Ammo taklif avgust oyining so‘nggi kunida — transfer oynasi yopilishiga 20 soat qolganida kelib tushdi. Bu shundan dalolat beradiki, "Barsa" avval futbolchining o‘zi bilan kelishib olib, shundan so‘ng bizga murojaat qilgan.

Bitta narsani tushunish lozim, «Barselona»ning taklifi kulgili edi. Bu taklif bizga nisbatan hurmatsizlik edi va u bizni qiziqtirmadi. Rabyo kabi futbolchilarning transferi bir kunda hal bo‘ladigan ish emas. Nazarimda, «Barselona» avvalroq futbolchi bilan kelishuvga erishib bo‘lgan.

Tushuning, biz Rabyo bilan shartnomani uzaytirish borasida prinsipial kelishuvga erishgandik. Ammo keyinchalik futbolchi hech qanday sabablarsiz muzokaralarni to‘xtatib qo‘ydi. Ishonchim komil, Adriyen boshqa jamoa bilan kelishib qo‘ygani uchun shunday yo‘l tutdi.

«Barselona»ning harakatlaridan hayron bo‘ldimmi? Klublar qoidalarga amal qilishmasa, bu holat hamisha shokka tushiradi.

Rabyo qishdayoq «PSJ»ni tark etishi mumkinmi? Adriyen menga shuni aytdiki, u klubda qolishni istamaydi», — dedi Enrike.

Avvalroq OAVda Rabyo yanvar oyida «Barselona» bilan shartnoma imzolab, yozda erkin agent sifatida "ko‘k-anorranglilar" safiga o‘tishi haqida xabar tarqalgandi.