«Пари Сен-Жермен» спорт директори Антеро Энрике ярим ҳимоячи Адриен Рабьонинг онаси Вероник Рабьонинг сўзларига изоҳ бериб ўтди. Футболчининг онаси ёзда "Барселона" Адриеннинг трансфери борасида таклиф юборгани, аммо парижликлар уни сотмагани ҳақида айтиб ўтганди.

«Вероник Рабьо фикрлари мени ҳайрон қолдирди. Унинг айтишича, биз ёзда Адриенннинг трансфери борасида "Барселона"дан таклиф олганмиз. Ҳа, бу ҳақиқат. Аммо таклиф август ойининг сўнгги кунида — трансфер ойнаси ёпилишига 20 соат қолганида келиб тушди. Бу шундан далолат берадики, "Барса" аввал футболчининг ўзи билан келишиб олиб, шундан сўнг бизга мурожаат қилган.

Битта нарсани тушуниш лозим, «Барселона»нинг таклифи кулгили эди. Бу таклиф бизга нисбатан ҳурматсизлик эди ва у бизни қизиқтирмади. Рабьо каби футболчиларнинг трансфери бир кунда ҳал бўладиган иш эмас. Назаримда, «Барселона» аввалроқ футболчи билан келишувга эришиб бўлган.

Тушунинг, биз Рабьо билан шартномани узайтириш борасида принципиал келишувга эришгандик. Аммо кейинчалик футболчи ҳеч қандай сабабларсиз музокараларни тўхтатиб қўйди. Ишончим комил, Адриен бошқа жамоа билан келишиб қўйгани учун шундай йўл тутди.

«Барселона»нинг ҳаракатларидан ҳайрон бўлдимми? Клублар қоидаларга амал қилишмаса, бу ҳолат ҳамиша шокка туширади.

Рабьо қишдаёқ «ПСЖ»ни тарк этиши мумкинми? Адриен менга шуни айтдики, у клубда қолишни истамайди», — деди Энрике.

Аввалроқ ОАВда Рабьо январь ойида «Барселона» билан шартнома имзолаб, ёзда эркин агент сифатида "кўк-анорранглилар" сафига ўтиши ҳақида хабар тарқалганди.