Якшанба куни Мадриднинг «Реал» клуби «Барселона»га имкониятни бой берди (0:2) ва Ла Лигада чемпионлик учун бор бўлган охирги имкониятларини ҳам йўқотди. Килиан Мбаппе жароҳати сабабли қайдномадан ташқарида қолди.

Учрашув давомида юлдуз ҳужумчи ижтимоий тармоқларда пост қолдирди: у ўйинни томоша қилаётганини кўрсатиб, жамоадошларига далда берди. Бироқ «қаймоқранглилар» мухлислари футболчининг Францияга учиб кетганидан шубҳалана бошлашди. Чунки суратдан кўриниб турибдики, у ўйинни Испанияда Ла Лигани кўрсатиш ҳуқуқига эга бўлмаган Франция телеканали трансляцияси орқали томоша қилган.

Бундан аввал ҳам Мбаппе Сардиниядаги таътил лаҳзалари тармоққа сизиб чиққанида танқидларга учраган эди. «Эл-Класико» олдидан эса футболчи «Барселона»га қарши баҳснинг асосий таркибига киритилмаганини билгач, машғулотни муддатидан олдин тарк этгани ҳақида миш-мишлар тарқалган эди.