Англия терма жамоаси ва “Лестер” клуби собиқ футболчиси Жейми Варди фаолиятини Ўзбекистонда давом эттириши мумкин. “Дарё” манбаси берган маълумотларга кўра, Фарғонанинг “Нефтчи” клуби англиялик ҳужумчини ўз сафига қўшиб олиш устида иш олиб бормоқда.
Манбанинг қўшимча қилишича, фарғоналиклар Элит Осиё Чемпионлар Лигасидаги иштироки олдидан ҳужум чизиғини кучайтириш мақсадида 39 ёшли футболчига расмий таклиф юборган. Янги мавсумда қитъанинг энг нуфузли клублар мусобақасида иштирок этадиган Фарғона жамоаси раҳбарияти таркибни халқаро тажрибага эга бўлган ўйинчи билан бойитишни мақсад қилган. Шу сабабли клуб мутасаддилари айнан англиялик ҳужумчи варианти устида тўхталган.
Маълумот ўрнида, Жейми Варди фаолиятининг энг ёрқин йилларини “Лестер” сафида ўтказган ва 2016-йилда жамоа билан Англия Премьер Лигасида чемпионликни қўлга киритган. Шунингдек, у 2019/20-йилги мавсумда чемпионатнинг энг яхши тўпурарига айланган. 2025-йилда ҳужумчи “Лестер”ни тарк этиб, Италиянинг “Кремонезе” клуби билан шартнома имзолади. 2026-йилнинг ёзида эса Англияга қайтиб, Чемпионшип вакили “Бёрнли” сафига бориб қўшилди. Ҳозирда Transfermarkt портали Вардининг бозор қийматини 1 миллион еврога баҳоламоқда.
