Британиялик журналист Пирс Морган Криштиану Роналду миллий жамоа қароргоҳини тарк этганидан сўнг Португалия термаси 7-рақамли футболкани навбатдаги икки ўйин учун вингер Рафаэл Леауга беришга қарор қилгани ҳақидаги хабарларга муносабат билдирди.
"Агар бу рост бўлса, жирканч ҳолат. Шунча воқеадан кейин ҳам шундай қилишяпти. Криштиану Португалия учун жуда кўп иш қилди, нима учун улар унга бундай муносабатда бўляпти? Кеча унинг отасининг туғилган куни эди. У ҳатто отаси вафот этганидан кейинги куни ҳам ўз мамлакати учун майдонга тушган. Улар тарихидаги энг буюк футболчига нисбатан бундай ҳайратланарли ҳурматсизликни кўриш уят", — деб ёзди Морган X ижтимоий тармоғидаги саҳифасида.
30 сентябрь куни Роналду Португалия терма жамоаси қароргоҳини тарк этди. У ўз баёнотида бу қарорни нима сабабдан қабул қилганини вақти келганда тушунтиришини маълум қилди.
