«Барселона»да ижара асосида тўп сураётган «Ал-Ҳилол» ҳимоячиси Жоау Канселу Саудия клубида юз берган нохуш воқеа ҳақида сўзлаб берди. Португалиялик футболчи қишки трансфер ойнасида «кўк-анорранглилар» сафига келиб қўшилган эди. Ижара келишуви мавсум якунига қадар мўлжалланган.

«Ал-Ҳилол»да мени алдашди. Клуб мени лига ўйинларида иштирок этиш учун рўйхатдан ўтказишга ваъда берганди, бироқ муддат тугагач, мени қайдномага киритишмади. Одамлар кўпинча характерим ёмонлиги ҳақида гапиришади, лекин мен шунчаки ўз сўзимда тураман ва ундан ҳеч қачон қайтмайман», — дея Barca Universal Канселунинг сўзларини келтиради.

Турли ОАВ маълумотларига кўра, «Барселона» 31 ёшли футболчини ўз сафида сақлаб қолишдан манфаатдор. Латералнинг ўзи ҳам Каталонияда қолишни истамоқда.