Мадриднинг «Реал» клуби ҳужумчиси Килиан Мбаппе жароҳати сабабли «Барселона»га қарши ўйинни ўтказиб юборди. Француз жароҳатидан деярли фориғ бўлган ва «эл-класико»да «қаймоқранглилар» қайдномасига кириши мумкин эди.

Onda Cero нашрининг маълумотига кўра, учрашувдан бир кун олдинги машғулот вақтида юлдузли ҳужумчига ўйинни захира ўриндиғида бошлаши айтилган. Орадан беш дақиқа ўтиб, футболчи ўзида ноқулайлик сезаётганини маълум қилган ва тез орада машғулотни тарк этган, бу эса жамоадагиларнинг барчасини ҳайрон қолдирган.

Натижада Килиан Мбаппе ўйин қайдномасига киритилмади. Мадридликлар «Камп Ноу»да 0:2 ҳисобида имкониятни бой беришди ва каталонияликларнинг Ла Лигада муддатидан олдин чемпионликни расмийлаштиришига тўсқинлик қила олишмади.