Ўзбекистонлик ҳимоячи Абдуқодир Ҳусановнинг Англиянинг “Манчестер Сити” клуби билан тузган янги шартномаси бўйича молиявий тафсилотлар эълон қилинди. 22 ёшли футболчи жорий йилнинг июль ойида клуб билан 2031-йилнинг 30 июнига қадар амал қиладиган 5 йиллик шартнома имзолаган эди.

Capology портали маълумотларига кўра, Ҳусановнинг кафолатланган йиллик маоши 5,2 миллион фунт стерлингни ташкил қилади (ҳафтасига 100 минг фунт). Беш йиллик шартноманинг умумий кафолатланган қиймати 26 миллион фунтга тенг.

Шартномада натижаларга боғлиқ қўшимча бонуслар ҳам кўзда тутилган. Бонуслар орқали футболчи ҳафтасига яна 25 минг фунт (йиллик 1,3 миллион фунт) даромад қилиши мумкин. Барча бонуслар ҳисобга олинган тақдирда, ҳимоячининг максимал йиллик маоши 6,5 миллион фунтга етади.

Маълумот ўрнида, жамоанинг энг юқори маош олувчи футболчиси Эрлинг Ҳоланд ҳисобланади. Унинг ҳафталик асосий даромади 525 минг фунтни ташкил этади. Кейинги ўринларда Жек Грилиш (300 минг фунт), Омар Мармуш (295 минг фунт), Фил Фоден (280 минг фунт) ва Жанлуижи Доннарумма (265 минг фунт) қайд этилган.