21 dekabr kuni Andijon shahrida akademiyalarning sport ishlari bo‘yicha direktor o‘rinbosarlari hamda tahlilchilari uchun o‘quv-seminari boshlangani haqida avval xabar berib o‘tgandik.
 
Seminar davomida ishtirokchilarga akademiya tarbiyalanuvchilari mashg‘ulotlarini qanday tasvirga olish va tasvirgan olingan materialdan qay tarzda foydalanish bo‘yicha amaliy ko‘rsatmalar berib borilmoqda. Shuningdek, tayyor videoyozuvlarni qanday tahlil qilish bo‘yicha ham batafsil ma’lumot berilyapti.
 
Kecha seminar qatnashchilar Andijon bolalar va o‘smirlar futbol akademiyasining 2005 yilda tavallud topgan tarbiyalanuvchilari o‘quv mashg‘ulot jarayonida bevosita ishtirok etishdi. Shundan so‘ng, Qirg‘iziston Respublikasining O‘sh futbol akademiyasi 2003 yil tarbiyalanuvchilari hamda Andijon viloyati bolalar va o‘smirlar futbol akademiyasi tarbiyalanuvchilari o‘rtasida o‘rtoqlik uchrashuvi o‘tkazilib, yakunda andijonliklar 3:0 hisobida g‘alaba qozonishdi.

O‘FA tomonidan tashkil etilgan mazkur o‘quv-seminari bugun o‘z nihoyasiga yetadi. Seminarning so‘nggi kunida hududiy bolalar va o‘smirlar futbol akademiyalarining sport ishlari bo‘yicha direktor o‘rinbosarlari yakuniy hisobotlarini topshirishadi.