Joriy yilning 22-28 dekabr kunlari Singapurda o‘tgan gandbol bo‘yicha Janubi-SHarqiy Osiyo ochiq chempionati musobaqasida o‘zbekistonlik 21 yoshgacha bo‘lgan qizlar g‘oliblikni qo‘lga kiritdi. Bu haqda Jismoniy tarbiya va sport vazirligi matbuot xizmati xabar berdi.
Qizlar musobaqa davomida o‘tkazilgan o‘yinlarda hindistonliklardan 24-20, Xitoy Taypeydan 20-13 va Singapur jamoasidan 30-15 hisobida ustun kelishdi. 28 dekabr kuni o‘tkazilgan finalda o‘zbekistonliklar Yaponiya terma jamoasiga qarshi maydonga chiqib, 29-22 hisobida g‘alaba evaziga chempionlikni qo‘lga kiritishdi.
O‘zbekiston yoshlar jamoasi esa Hindistonni 27-15, Malayziyani 40-15, Xitoy Taypeyni 36-11, Gonkongni 23-17 va mezbon Singapurni 47-15 hisobida mag‘lubiyatga uchratishdi. 28 dekabr kuni o‘tkazilgan finalda Yaponiya jamoasiga qarshi kechgan bahslarda yigitlar 23-26 hisobida imkoniyatni boy berishdi va ikkinchi o‘rinni qo‘lga kiritishdi.
Musobaqa yakunida qizlardan Umida Xudoyqulova “Eng yaxshi darvozabon”, Dilbar Bahromova “Eng yaxshi o‘yinchi” nominasiyasida g‘olib chiqqan bo‘lsa, o‘g‘il bolalar o‘rtasida Sardor Elmurodov “Eng yaxshi darvozabon” va Suhrob Davronov “Eng yaxshi o‘yinchi” deb topildi.
