Жорий йилнинг 22-28 декабрь кунлари Сингапурда ўтган гандбол бўйича Жануби-Шарқий Осиё очиқ чемпионати мусобақасида ўзбекистонлик 21 ёшгача бўлган қизлар ғолибликни қўлга киритди. Бу ҳақда Жисмоний тарбия ва спорт вазирлиги матбуот хизмати хабар берди.
Қизлар мусобақа давомида ўтказилган ўйинларда ҳиндистонликлардан 24-20, Хитой Тайпейдан 20-13 ва Сингапур жамоасидан 30-15 ҳисобида устун келишди. 28 декабрь куни ўтказилган финалда ўзбекистонликлар Япония терма жамоасига қарши майдонга чиқиб, 29-22 ҳисобида ғалаба эвазига чемпионликни қўлга киритишди.
Ўзбекистон ёшлар жамоаси эса Ҳиндистонни 27-15, Малайзияни 40-15, Хитой Тайпейни 36-11, Гонконгни 23-17 ва мезбон Сингапурни 47-15 ҳисобида мағлубиятга учратишди. 28 декабрь куни ўтказилган финалда Япония жамоасига қарши кечган баҳсларда йигитлар 23-26 ҳисобида имкониятни бой беришди ва иккинчи ўринни қўлга киритишди.
Мусобақа якунида қизлардан Умида Худойқулова “Энг яхши дарвозабон”, Дилбар Баҳромова “Энг яхши ўйинчи” номинациясида ғолиб чиққан бўлса, ўғил болалар ўртасида Сардор Элмуродов “Энг яхши дарвозабон” ва Суҳроб Давронов “Энг яхши ўйинчи” деб топилди.
