Саккиз карра “Олтин тўп” соҳиби бўлган аргентиналик ҳужумчи Лионель Месси Испаниянинг иккинчи дивизиони (Сегунда) вакили “Элденсе” футбол клубининг 100 фоиз акциясини сотиб олиш бўйича келишувга эришди. Marca нашрининг хабар беришича, айни пайтда келишув сўнгги босқичда бўлиб, томонлар юридик жараёнларни якунламоқда.
Бу аргентиналик ҳужумчининг 2026 йил давомида футбол клублари билан боғлиқ иккинчи хариди ҳисобланади. Бунгача у жорий йилнинг апрель ойида Барселона провинциясининг Баш-Лёбрегат ҳудудида жойлашган Каталониянинг “Корнеля” клубини ҳам сотиб олган эди. Манбанинг қўшимча қилишича, Месси “Интер Майами”даги фаолиятини якунлаганидан сўнг айнан “Элденсе” клуби базаси жойлашган Аликанте провинциясининг Элда шаҳрида муқим яшашни режалаштирмоқда.
Маълумот ўрнида, Месси 2023-йилдан буён АҚШнинг “Интер Майами” жамоаси шарафини ҳимоя қилиб келмоқда. У жамоаси билан 2025-йилда MLS чемпионлигини қўлга киритган. 2025-йилнинг октябрь ойида аргентиналик юлдуз Америка клуби билан амалдаги шартномасини 2028-йилнинг охирига қадар узайтирди.
Жорий йилнинг 31 август куни Месси Аргентина миллий терма жамоасидаги фаолиятини якунлаганини расман эълон қилди. Ҳужумчи ўз фаолияти давомида бир қатор йирик ютуқларни қўлга киритган. У Аргентина терма жамоаси сафида 2022-йилги Жаҳон чемпионати ғолибига айланган бўлса, 2026-йилги мундиалда финалга қадар етиб борган. Шунингдек, футболчи 2008-йилги Олимпиада ўйинларининг олтин медали соҳиби, икки карра Америка Кубоги (2021 ва 2024-йиллар) ҳамда Финалиссима—2022 мусобақалари ғолиби ҳисобланади.
Ҳужумчи шахсий рекордлар бобида ҳам ўзига хос натижаларни қайд этган. Хусусан, Месси мутлақ рекорд ўрнатган ҳолда 8 марта “Олтин тўп”ни қўлга киритган. Бундан ташқари, у 3 марта FIFA талқини бўйича йилнинг энг яхши футболчиси деб топилган, Европа чемпионатларининг энг яхши тўпурари сифатида 6 марта “Олтин бутса”га эга чиққан ҳамда 2 марта Жаҳон чемпионатининг “Олтин тўпи”га муносиб кўрилган.
