Sakkiz karra “Oltin to‘p” sohibi bo‘lgan argentinalik hujumchi Lionel Messi Ispaniyaning ikkinchi divizioni (Segunda) vakili “Eldense” futbol klubining 100 foiz aksiyasini sotib olish bo‘yicha kelishuvga erishdi. Marca nashrining xabar berishicha, ayni paytda kelishuv so‘nggi bosqichda bo‘lib, tomonlar yuridik jarayonlarni yakunlamoqda.

Bu argentinalik hujumchining 2026 yil davomida futbol klublari bilan bog‘liq ikkinchi xaridi hisoblanadi. Bungacha u joriy yilning aprel oyida Barselona provinsiyasining Bash-Lyobregat hududida joylashgan Kataloniyaning “Kornelya” klubini ham sotib olgan edi. Manbaning qo‘shimcha qilishicha, Messi “Inter Mayami”dagi faoliyatini yakunlaganidan so‘ng aynan “Eldense” klubi bazasi joylashgan Alikante provinsiyasining Elda shahrida muqim yashashni rejalashtirmoqda.

Ma’lumot o‘rnida, Messi 2023-yildan buyon AQSHning “Inter Mayami” jamoasi sharafini himoya qilib kelmoqda. U jamoasi bilan 2025-yilda MLS chempionligini qo‘lga kiritgan. 2025-yilning oktyabr oyida argentinalik yulduz Amerika klubi bilan amaldagi shartnomasini 2028-yilning oxiriga qadar uzaytirdi.

Joriy yilning 31 avgust kuni Messi Argentina milliy terma jamoasidagi faoliyatini yakunlaganini rasman e’lon qildi. Hujumchi o‘z faoliyati davomida bir qator yirik yutuqlarni qo‘lga kiritgan. U Argentina terma jamoasi safida 2022-yilgi Jahon chempionati g‘olibiga aylangan bo‘lsa, 2026-yilgi mundialda finalga qadar yetib borgan. Shuningdek, futbolchi 2008-yilgi Olimpiada o‘yinlarining oltin medali sohibi, ikki karra Amerika Kubogi (2021 va 2024-yillar) hamda Finalissima—2022 musobaqalari g‘olibi hisoblanadi.

Hujumchi shaxsiy rekordlar bobida ham o‘ziga xos natijalarni qayd etgan. Xususan, Messi mutlaq rekord o‘rnatgan holda 8 marta “Oltin to‘p”ni qo‘lga kiritgan. Bundan tashqari, u 3 marta FIFA talqini bo‘yicha yilning eng yaxshi futbolchisi deb topilgan, Yevropa chempionatlarining eng yaxshi to‘purari sifatida 6 marta “Oltin butsa”ga ega chiqqan hamda 2 marta Jahon chempionatining “Oltin to‘pi”ga munosib ko‘rilgan.