Toshkentning "Lokomotiv" klubi bosh murabbiyi Andrey Fyodorov yangi mavsum oldidan jamoaning rejalari haqida fikr bildirdi.
- Avvalo barchani kirib kelgan yangi yil bilan tabriklayman, unda orzu qilgan barcha tilaklaringiz ushalishini tilab qolaman.
Yangi mavsumga tayyorgarlikni 3 yanvar kuni Toshkentda boshladik va u yerda 6 kun mashg‘ulotlar o‘tkazdik. Shundan keyin navbatdagi mavsumga kuchliroq tayyorgarlik ko‘rish maqsadida o‘quv-mashg‘ulot yig‘inlarini o‘tkazish uchun Dubayga yetib keldik. Chunki endi mavsum oldingilariga qaraganda ikki hafta keyinroq boshlanadi. Ha, Superkubok doirasidagi o‘yinimiz bor.
Tushunarliki, "Lokomotiv"ning oldidagi asosiy vazifasi - har bir uchrashuvda g‘alaba qozonish. Biroq, asosiysi hozirda barcha futbolchilar sog‘-salomat, shu boisdan tayyorgarlik ham yaxshi ketmoqda. Asosiy futbolchilarimizning bir necha nafari endi boshqa klub safida harakat qilishadi. Ularning keyingi faoliyatiga omad tilayman. Yangi olgan o‘yinchilar ketganlarning o‘rnini to‘liqligicha bosa oladi deb o‘ylayman. Shu boisdan ayta olaman. Jamoa o‘tgan mavsumda ko‘rsatgan jangovorlikni yo‘qotmaydi.
Odatga ko‘ra yig‘inlarni o‘tkazish uchun Dubayga yetib keldik. Bu yerning sharoitlari juda ham yaxshi. Menga qadar ham "Lokomotiv" ko‘p bora bu yerdagi yig‘inlarda bo‘lgan. Bu joyning sharoitlari yangi mavsum uchun ajoyib tarzda tayyorgarlik ko‘rish uchun juda mos.
O‘tgan mavsum "Lokomotiv" uchun qiyin o‘tdi. Biroq g‘alabalarning ta’mi juda yoqimli bo‘ldi. Ha, O‘zbekiston kubogida biroz ko‘ngilsizlik kuzatildi, musobaqani ertaroq tark etdik. Ammo aytishim mumkinki, natijalardan biz ham, rahbariyat ham, asosiysi yigitlar ham mamnun. Bunday formatda ilk marta o‘ynagan bo‘lsak-da, mavsum yaxshi o‘tdi.
Keyingi mavsum biz uchun yanada qiyinroq bo‘ladi. Chunki raqiblar "Lokomotiv"ga qarshi jangovorlik ruhi bilan o‘ynaydi. Shu boisdan o‘yindan o‘yinga barchasi qiyinlashib ketadi. Ishlarning qiyin bo‘lgani ham juda yaxshi. Chunki qiyin vazifalar tufayli futbolchilar o‘zlarini yanada yaxshiroq ko‘rsatishga intilishadi.
