Xabaringiz bor, aprel oyida poytaxtimizda velosportning shosse yo‘nalishi bo‘yicha Osiyo chempionati bo‘lib o‘tadi. Ayni paytda poytaxtimizda ushbu musobaqani yuqori saviyada tashkil etish uchun tayyorgarlik ishlari qizg‘in davom etmoqda.

Shu maqsadda, bugun Osiyo chempionatiga tayyorgarlikning tashkiliy-amaliy ishlarini olib borish uchun musobaqa direktori Xofer Roland hamda texnik ishlar bo‘yicha direktor yordamchisi Neumann Adre O‘zbekistonga kelishdi.

Mutaxassislar tashrif doirasida O‘zbekiston velosiped sporti federasiyasi bosh kotibi Kozim O‘rinboyxo‘jayev bilan uchrashib, qit’a birinchiligiga tayyorgarlik jarayonini muhokama qildilar. Ular mazkur safar davomida Osiyo chempionati o‘tkaziladigan Toshkent-CHimyon-Sijjak avtomagistral yo‘llarini ko‘zdan kechiradilar. Shuningdek, musobaqani tashkil etish masalasida seminar o‘tkazadilar. Bundan tashqari, poygalar o‘tkaziladigan start, finish chiziqlari ham yaqin kunlarda belgilanishi kutilmoqda.

Eslatib o‘tamiz, O‘zbekiston shosse bo‘yicha Osiyo chempionatiga ilk marotaba mezbonlik qiladi. Olimpiya o‘yinlariga lisenziya taqdim etadigan ushbu musobaqa 22-28 aprel kunlari bo‘lib o‘tadi. Unda qit’amizning 40 ga yaqin mamlakatidan, 500 nafardan ziyod sportchi ishtirok etishi rejalashtirilmoqda.