Osiyo chempionlar ligasi 2-saralash bosqichidan o‘rin olgan “Paxtakor” hamda “Ey Fors” jamoalari o‘rtasidagi bahs yakunlandi. Mazkur o‘yinda “sherlar” 2:1 hisobida g‘alaba qozonib, keyingi bosqichga yo‘l oldi. O‘yindan keyin Shota Arveladze va Marat Bikmayev matbuot anjumanida savollarga javob berdi.
Arveladze: - Muxlislarga rahmat aytaman. Ular ajoyib muhit hosil qilishdi. Tribunaning qo‘llashini his qilib turdik. Biz birinchi rasmiy o‘yinni o‘tkazdik, to‘liq tashabbusga ega bo‘ldik.
Bikmayev: - Ishqibozlardan minnatdormiz. O‘yinda zafar quchishni maqsad qilgandik va buni uddaladik
Arveladze: - Qulay vaziyatlardan foydalana olmadik. Lekin qiyinroq holatlarda gol urganimiz sifat va ish hajmini ko‘rsatib berdi.
- Ikkinchi bo‘limda o‘yinni to‘liq nazorat qildik. Raqibda ikkinchi bo‘limda birgina imkoniyat bo‘ldi. Hamdamov zaxiradan tushib o‘yinni kuchaytirdi, yaxshi kirishib ketdi.
Yaxshiboyev yig‘inda o‘zini ko‘rsatdi. Bugun imkon qadar foyda keltirishga harakat qildi. Hali kuchliroq o‘ynay oladi. Har bir futbolchi o‘zini yaxshi tarafdan namoyish etishga intildi.
