Xalqaro futbol uyushmalari kengashi (IFAB) Shotlandiyaning Aberdinida o‘tgan yig‘ilishda futbol qoidalarining yangi tahririni tasdiqladi. Bu haqda tashkilot matbuot xizmati ma’lum qildi.
Birinchi navbatda to‘pga qo‘l bilan o‘ynash holatiga aniqlik kiritilgan. Yangi tahrirga ko‘ra, endilikda golli uzatma berish yoki gol urilishi bilan tugagan to‘pga qo‘l bilan o‘ynalgan holatda to‘pga ataylab tegilmagan bo‘lsa ham, gol hisobga olinmaydi va futbolchi ehtiyotsizlik uchun jazolanadi.
Ikkinchi o‘zgarish — almashtirilayotgan futbolchi maydonni unga eng yaqin joyidan tark etishidan iborat. Avval futbolchilar butun maydon orqali texnik hududga borish kerak bo‘lgan. Bu o‘zgarish ataylab vaqtni cho‘zmaslik maqsadida kiritildi.
Uchinchidan, jamoa vakillariga sportga xos bo‘lmagan xatti-harakatlar uchun sariq va qizil kartochkalar ko‘rsatilishi bilan bog‘liq qoidalar aniqlashtirildi. Shuningdek, to‘p darvozadan o‘yinga kiritilganda unga himoyachi tegishidan oldin jarima maydonini tark etishi lozimligi qoidasi bekor qilindi.
Qoidalar ichida eng ahamiyatlisi — jarima zarbasini amalga oshirish vaqtida jonli devor hosil qilinishi bilan bog‘liqdir. Endilikda hujum qilayotgan jamoa futbolchilariga jarimani amalga oshirish vaqtida raqib jamoa futbolchilariga xalaqit qilish va to‘p uchun ochiq joy qoldirish maqsadida jonli devorga turish taqiqlanadi. AP nashri xabarida aniqlik kiritilishicha, hujum qilayotgan jamoa futbolchilariga jonli devorga 1 metrdan yaqinroq masofada turish taqiqlanadi.
Shuningdek, penalti amalga oshirilishi vaqtida darvozabonlarga bir oyoqlarini darvoza chizig‘ida ushlab turishlari kifoya qiladi. Avval bunday holatda darvozabonlar ikki oyoqlarini chiziq ustida ushlab turishi talab etilgan. Yangi qoidalar 2019 yil 1 iyundan kuchga kiradi.
