Shu yilning 22-26 mart kunlari Osiyo mamlakatlari bo‘ylab 23 yoshgacha bo‘lgan futbolchilar o‘rtasida Osiyo chempionati yo‘llanmalari uchun saralash bahslari bo‘lib o‘tdi.
Qit’amizning 43ta terma jamoasi 11ta guruhga bo‘lingan holda 15ta yo‘llanma uchun kurash olib borishdi (guruh g‘oliblari va 2-o‘rinni egallagan jamoalar orasida eng yaxshi ko‘rsatkichga ega bo‘lgan 4ta jamoa).
"F" guruhi bahslari poytaxtimizda o‘tkazildi. Pokiston saralashda ishtirok etishdan bosh tortgani bois, guruhda 3ta jamoa qoldi. O‘zbekiston va Tojikiston olimpiyachilari dastlab Hindistonni mag‘lub etishdi. So‘nggi o‘yinda esa bu jamoalar o‘zaro durang o‘ynashdi. Natijada Drulovich shogirdlari guruhda 1-o‘rin bilan Osiyo chempionati yo‘llanmasini qo‘lga kiritishdi.
Tojikiston esa 4 ochko (to‘plar farqi — 2:0) bilan qit’a chempionati yo‘llanmasini qo‘lga kiritish uchun yaxshi imkoniyat hosil qilgandi, ammo Usmon Toshev jamoasi boshqa guruhlardagi natijalarni kutishi kerak edi. Aksiga, boshqa guruhlardagi jamoalar ham so‘nggi turda o‘zlariga kerakli natijani qayd etishdi:
"S" guruhi. Iroq - Eron - 0:0
"D" guruhi. Saudiya Arabistoni - BAA - 1:1
"E" guruhi. Iordaniya - Suriya - 1:1
Natijada 2-o‘rinni egallagan jamoalar reytingida Eron, Suriya va Saudiya Arabistoni jamoalari 4 ochko va 3-1 ko‘rinishidagi to‘plar nisbati bilan Tojikistondan o‘tib ketishdi. Qo‘shnilarimiz bu jadvalda 5-o‘rinda qolib ketishdi.
Tojikiston shunday holatda ham qit’a chempionati yo‘llanmasiga ega bo‘lishi mumkin edi, agar OCH-2020 mezboni — Tailand saralash bosqichida guruh g‘olibi bo‘lganida yoki 2-o‘rinni egallagan jamoalar orasida kuchli to‘rtlikka kirganida...
23 yoshgacha bo‘lgan futbolchilar o‘rtasidagi Osiyo chempionatining final bosqichi 2020 yilning 8-26 yanvar kunlari oralig‘ida Tailandning Bangkok va Patum Tani shaharlaridagi 4ta stadionda bo‘lib o‘tdi. Bu musobaqa Tokio-2020 olimpiadasiga yo‘llanmalar taqdim etadi.
