O‘zbekiston Milliy olimpiya qo‘mitasi prezidenti, O‘zbekiston futbol Assosiasiyasi Birinchi vise-prezidenti Umid Ahmadjonov bugun ishchi guruh bilan Andijonda bo‘lib turgani haqida xabar bergan edik.
Tashrifdan ko‘zlangan asosiy maqsad Andijonda futbolni, xususan, bolalar futbolini rivojlantirish borasida amalga oshirilayotgan chora-tadbirlar bilan yaqindan tanishish sanaladi. Tashrif davomida Umid Ahmadjonov Sho‘rbuloq dahasida joylashgan viloyat bolalar-o‘smirlar futbol akademiyasiga ham tashrif buyurdi.
MOQ prezidenti Umid Ahmadjonov o‘tgan yilning 2 fevral kuni Andijonga tashrif buyurib, viloyat sportining o‘sha vaqtdagi holati bilan yaqindan tanishgan va zarur ko‘rsatmalar bergan edi. Bu galgi tashrif chog‘ida esa o‘tgan vaqt davomida amalga oshirilgan ishlar bilan yaqnidan tanishildi. Shuningdek, akademiya tarbiyalanuvchilari va murabbiylar bilan ham suhbatda bo‘lib, akademiya rahbariyati oldiga kerakli vazifalarni belgilab berdi.
Ma’lumki, joriy yilda “Andijon” futbol klubi Andijon viloyati bolalar-o‘smirlar futbol akademiyasi bilan o‘zaro hamkorlik bo‘yicha tuzgan shartnomasi asosida “Andijon-2” farm klubini tuzgan va mazkur jamoa B Pro-ligada ishtirok etmoqda. Ushbu klub asosini yaqin vaqt ichida to‘laligicha bolalar-o‘smirlar futbol akademiyasi tarbiyalanuvchilari tashkil etishi ko‘zda tutilgan.
