Bilasiz, O‘zbekiston Professional futbol ligasi milliy chempionatlarimiz uchrashuvlariga muxlislar tashrifini ko‘paytirish, milliy futbolimizga bo‘lgan jamoatchilik e’tibori va qiziqishini orttirish yo‘lida qator loyiha va tashabbuslarni amalga oshirib kelmoqda.

Jumladan, yurtimizdagi barcha stadionlarda ishqibozlarga qator qulayliklar yaratishga katta e’tibor qaratilmoqda. Xususan, endilikda barcha jamoalarda klub do‘konlari faoliyat yuritmoqda. Do‘konlarda klublar attributikalari savdolari yo‘lga qo‘yildi. Shuningdek, ishqibozlar uchun o‘yindan oldin va tanaffus vaqtida turli shou dasturlari va aksiyalar tashkil etilmoqda.

Mazkur yo‘nalishda ishlarni yanada jadallashtirish maqsadida O‘zbekiston Professional futbol ligasi “EVENT ART WEDDING” korxonasi bilan yaqindan hamkorlik qilish bo‘yicha memorandum imzoladi. Unga ko‘ra, mazkur korxona O‘zbekiston Professional futbol ligasi tomonidan o‘tkaziladigan barcha musobaqalar – Superliga, Pro-liga, O‘zbekiston Kubogi, ayollar futboli, futzal chempionatlari jarayonida muxlislar uchun futbolka, suvenir mahsulotlari, attributikalar sotuvini yo‘lga qo‘yadi hamda o‘yin kuni stadionda ruxsat berilgan oziq-ovqat mahsulotlari va ichimliklar savdosini hammaga etarlicha miqdorda, maqbul va arzon narxlarda sotilishini ta’minlashga mas’ul bo‘ladi.

Shuningdek, muxlislarga qo‘shimcha qulayliklar yaratish maqsadida Telegram bot yordamida muxlislar o‘tirgan joylariga buyurtmalarni yetkazib berish xizmatini yo‘lga qo‘yish ham ko‘zda tutilgan.

Qolaversa, stadionlarga ishqibozlar oqimini yanada ko‘paytirish, ularning milliy futbolimizga qiziqishini orttirish uchun o‘yin boshlanishidan oldin va tanaffus vaqtida turli aksiyalarni tashkil etishda va yurtimizdagi mashhur futbolchilarning 3D maketlari yordamida stadion sektorlariga kirish joylarida foto hududlar yaratish borasida ham ikki tomon hamkorlikda ish olib boradi. 

O‘zaro kelishuvga ko‘ra yana bir qator loyihalar amalga oshirilishi ko‘zda tutilgan.