Bugun jamoamiz a’zolari joriy mavsumdagi ilk mashg‘ulotni o‘zlari uchun qadrdon bo‘lgan “Markaziy” o‘yingoh maydonida o‘tkazishdi. Mashg‘ulot yakuniga yetgach, “lochinlar” ustozi Andrey Kanchelskisdan chimi yangilangan maydon va bo‘lajak o‘yin borasida intervyu oldik. Uning fikrlari quyidagicha bo‘ldi:
Maydon juda ajoyib va unga gap bo‘lishi mumkinmas.Fursatdan foydalanib, bizga shunday sifatli hamda ajoyib maydonni tuhfa etgan klub rahbariyatiga o‘z minnatdorchiligimni bildirmoqchiman. Rahbarlar buyuk ishni amalga oshirishdi. Barcha narsa a’lo bo‘lsa, hammasi yaxshi bo‘ladi.
Bo‘lajak o‘yinga tayyorgarlik borasida to‘xtaladigan bo‘lsam, o‘zingizga ma’lum, ortda qolgan 2 oy davomida biz asosan safarda o‘ynadik, ya’ni uy uchrashuvlarini Farg‘onada o‘tkazishga majbur bo‘ldik. Shunday ekan, joriy mavsumdagi o‘z maydonimizda o‘tkaziladigan ilk bahsni intizorlik bilan kutyapmiz. Umid qilamanki, 4 may kuni muxlislar stadionni to‘ldirib o‘tirishadi.
Tayyorgarlik odatdagidek, reja bo‘yicha davom etmoqda. Biz uchun har o‘yin juda muhim ahamiyatga ega. Bo‘lajak bahsda g‘alaba qozonib, 3 ochkoni qo‘lga kiritish niyatidamiz.
To‘rtinchi may kungi o‘yinda muxlislarga bayram kayfiyatini ulashish niyatidamiz. Har bir ishqiboz biz uchun muhim sanaladi.
To‘rtinchi may kuni stadionga keling hamda jamoamizni qo‘llab-quvvatlang!
“Navbahor” PFK matbuot xizmati.
