Joriy yil mamlakatimiz sportchilari uchun nihoyatda mas’uliyatli mavsumlardan biri hisoblanadi. Negaki 2019 yilgi sport mavsumi dunyo atletlariga Tokio-2020 olimpiadasiga qimmatli reyting ballarini jamg‘arishda muhim davrdir.   Yil boshidan beri Olimpiya o‘yinlari dasturiga kiritilgan sport turlaridan milliy terma jamoa a’zolari ko‘plab xalqaro musobaqalarda munosib qatnashib, o‘z reyting ballarini muntazam oshirib bormoqda. Ayniqsa, “sport qirolichasi” deb e’tirof etilgan yengil atletika yo‘nalishida atletlarimiz uchun mavsum ancha omadli va muvaffaqiyatli davom etyapti.   2019 yilning ortda qolgan birinchi choragi yakuniga ko‘ra yengil atletikaning ko‘pkurash yo‘nalishida vatanimiz sharafini himoya qilib kelayotgan Yekaterina Voronina o‘z yo‘nalishida mavsumning eng yaxshi natijasini qayd etib turibdi. U Qatarda o‘tkazilgan so‘nggi Osiyo chempionatida 6 198 ochko jamg‘arishga muvafaq bo‘ldi. Bu vaqtda boshqa qit’a birinchiliklari va turli halqaro musobaqalarda ishtirok etgan hech bir atlet Voroninaning natijasidan yaxshi ko‘rsatkich qayd etganicha yo‘q. Demak, hamyurtimizda Tokio-2020 olimpiadasi yo‘llanmasini qo‘lga kiritish uchun juda yaxshi imkoniyat hosil bo‘lgan.     Umid qilamizki, terma jamoamiz a’zolari shunday yuqori natijalarni qayd etishda davom etib, Tokio olimpiadasiga ham maksimal darajada yo‘llanmalarni qo‘lga kiritadi.