Rossiyalik murabbiy Igor Shalimov O‘zbekiston milliy terma jamoasining Jahon chempionati-2026dagi ishtirokiga baho berdi.

«O‘zbekiston terma jamoasi guruh bosqichidan keyin musobaqani tark etdi. Bu mantiqiy natija, ammo jamoa juda ko‘p — 11 ta gol o‘tkazib yubordi. Kannavaro himoya o‘yinini yaxshilay oladi, degan umidlar o‘zini oqlamadi. Umuman olganda, bosh murabbiyni almashtirish ham samara bermadi. Jamoani Jahon chempionatiga mahalliy mutaxassis olib chiqqan bo‘lsa, musobaqaning o‘zida unga Fabio Kannavaro rahbarlik qildi. Nahotki, mahalliy murabbiy bundan ham yomonroq natija ko‘rsatardi? Oqibatda natija ham bo‘lmadi, mablag‘ ham sarflandi. Bu qaror menga ma’qul kelmadi.

Jamoaning maydondagi jonbozligiga e’tirozim yo‘q. Shomurodov haqiqiy yetakchi va obro‘li futbolchi ekani ko‘rinib turibdi. Eldor ajoyib gol urdi. Ammo Husanov meni hayratda qoldirdi. U jarima maydonida to‘pni olib qo‘yishga uringanda xatoga yo‘l qo‘ydi va penaltiga sababchi bo‘ldi», — dedi Shalimov.