Xabar berganimizdek, 17-19 may kunlari Turkiyaning Istanbul shahrida karatening WKF yo‘nalishi bo‘yicha “A seriya” turkumiga kiruvchi yirik musobaqa bo‘lib o‘tdi. Quvonarlisi, mazkur turnirda ishtirok etgan ikki vakilimiz bronza medali bilan taqdirlanishdi.

Erkaklar o‘rtasida -60 kg vazn toifasida yurtimiz sharafini himoya qilgan Sadriddin Saymatov yarim finalgacha bo‘lgan yo‘lni muvaffaqiyatli bosib o‘tdi, biroq final ostonasida qozog‘istonlik Yerkinbek Baitureevga imkoniyatni boy berib qo‘ydi. Bronza medali uchun kechgan bellashuvda esa italiyalik Anjelo Krechenzo ustidan g‘alaba qozondi.

Shuningdek, ayollar o‘rtasida -61 kg vazn toifasida harakat qilgan Barno Mirzayeva ham shohsupaga ko‘tarilishga muvaffaq bo‘ldi. Hamyurtimizni ikkinchi davrada musobaqaning bo‘lajak g‘olibi turkiyalik Merv Choban mag‘lub etdi. Turk sportchisi finalgacha yetib kelgani uchun Mirzayevada bronza medali uchun kurashish imkoniyati paydo bo‘ldi. Yurtdoshimiz o‘tish bellashuvlarida Belgiya, Braziliya, Yekvador, Yaponiya, bronza medali uchun bahsda esa Tunis terma jamoasi vakilini dog‘da qoldirishga erishdi.

Ta’kidlash joiz, mazkur muvaffaqiyat orqali vakillarimiz Tokio Olimpiadasi uchun ham qimmatli reyting ochkolarini jamg‘ardilar.