«Tottenhem» himoyachisi Pedro Porro yozgi transfer oynasida London klubini tark etmaydi. Bu haqda Mundo Deportivo gazetasi xabar bermoqda.

Manbaning ma’lumotlariga ko‘ra, Porro o‘z agentiga boshqa klublar bilan hech qanday muzokaralar olib bormaslik bo‘yicha ko‘rsatma bergan. Ta’kidlanishicha, ispaniyalik futbolchi yaqinda «shporlar» bilan mehnat shartnomasini uzaytirgan va «Barselona»ning qiziqishiga qaramay, Londonda qolishni istamoqda.

O‘tgan mavsumda 26 yoshli Porro barcha turnirlarni hisobga olganda 47 ta uchrashuvda maydonga tushib, 2 ta gol urdi va 6 ta golli uzatmani amalga oshirdi.

Pedro Porroning «Tottenhem» bilan amaldagi mehnat shartnomasi 2031 yilgacha mo‘ljallangan. Transfermarkt mutaxassislari futbolchini 35 million yevroga baholamoqda.