AGMK – “Metallurg” uchrashuvidan keyin o‘tkazilgan matbuot anjumanida bekobodliklar ustozi Andrey Shipilov o‘z fikr-mulohazalarini bildirdi.

- Uch to‘rt kun ichida ikkita murosasiz o‘yin o‘tkazdik. Har ikkalasida jangovor durang qayd etildi. Chempionat o‘yinida biz birinchi bo‘lib gol urgandik, bugun esa birinchi bo‘lib gol o‘tkazib yubordik. Bugun futbolchilar katta hajmda jismoniy mehnat qilishdi. Bizni xursand qilgan jihati har ikkala uchrashuvda jamoa o‘z o‘yinini ko‘rsata oldi. Bugun oddiy xato tufayli gol o‘tkazib yuborganimizdan so‘ng futbolchilar o‘zlarini yo‘qotib qo‘yishmadi. O‘yinda burilish yasay oldik, hisobni tenglashtirdik. Shundan keyin ham o‘yinni tashlab qo‘ymadik. Oxirigacha kurashdik. Vaqtni cho‘zmadik, yana gol urish imkoniyati bo‘ldi. Oldinda yana bir muhim uchrashuv turibdi.

Endi “Qizilqum”ga qarshi o‘yinga tayyorgarlik ko‘ramiz. Mazkur uchrashuvda muxlislarimizni xursand etish, uch ochko olish uchun maydonga chiqamiz. O‘zbekiston kubogini vaqtli tark etdik. Hech bo‘lmasa mazkur kubok bahslarida uzoqroqqa borishni maqsad qilganmiz, deydi Andrey Sergeevich.