«Yuventus» darvozaboni Janluidji Buffon o‘ziga taqdim etilgan 1-raqamli futbolka va sardorlik bog‘ichini rad qilganini ta’kidladi. Eslatib o‘tamiz, hozirda 1-raqamda Voysex Shchesni o‘ynayotgan bo‘lsa, sardorlik bog‘ichi Jorjo Kyelliniga tegishli.
«Shchesni menga 1-raqamni taklif qilgan bo‘lsa, Kyellini sardorlik bog‘ichini berishini aytdi. Lekin men ularni olishni istamayman. Jorjo kabi sardorga ega bo‘lish — men uchun faxr. U men uchun ukamdek.
Men bu yerga maydonda qancha daqiqa harakat qilishni hisoblash uchun kelmadim. Shchesni asosiy darvozabon bo‘lishga haqli. Men esa unga zaxira posbon bo‘lish uchun hamisha tayyor bo‘lishim kerak», – dedi 41 yoshli Buffon.
Eslatib o‘tamiz, Buffon «Yuventus» bilan 2020 yilning yoziga qadar bo‘lgan shartnoma imzoladi.
Ma’lumot o‘rnida. Darvozabon o‘ziga 77-raqamni tanladi. U "Parma" klubida faoliyatini shu raqamli futbolkada boshlagan.
