Madridning “Real” klubi yangi xaridlarni amalga oshirish maqsadida tarkibda jiddiy “tozalash” ishlarini olib boradi. Bu haqda The Athletic nashri xabar berdi.

Manbaning ta’kidlashicha, jamoa himoyachilari David Alaba va Antonio Ryudiger shartnomasi yakunlangach, erkin agent sifatida klubni tark etishi kutilmoqda. Shuningdek, rahbariyat zaxira o‘yinchilari Daniel Sebalyos va Gonsalo Garsiyani sotish variantlarini ko‘rib chiqmoqda. Jamoa sardori Daniel Karvaxalning klubdagi kelajagi esa hozircha noaniqligicha qolmoqda.

Klub rahbariyati bo‘lajak transfer oynasini “navbatdagi oddiy jarayon” deb atayotgan bo‘lsa-da, vaziyatdan xabardor manbalar yangi futbolchilarni sotib olish uchun tarkibdagilardan bir qanchasini sotish zarurligini ta’kidlamoqda. O‘zgarishlar kutilganidan ham keng ko‘lamli bo‘lishi, hatto klubning sport bo‘limida tarkibiy islohotlar amalga oshirilishi ham istisno etilmayapti.

Ma’lumot uchun, “Real” joriy mavsumni sovrinsiz yakunlamoqda. Jamo Ispaniya Kubogida “Albasete”ga mag‘lub bo‘lgan bo‘lsa, La Liga chempionligi uchun kechgan kurashda “Barselona”ga imkoniyatni boy berdi. Chempionlar Ligasida esa “Bavariya”ga mag‘lub bo‘lib, turnir bilan xayrlashdi.