Hindiston Shaxmat federasiyasi, Osiyo Shaxmat federasiyasi va FIDE boshchiligida milliy shaxmat federasiyalarini Hindistonning Nyu-Dehli shahrida bo‘lib o‘tadigan shaxmat bo‘yicha G‘arbiy Osiyo yoshlar va o‘smirlar chempionatida ishtirok etish uchun taklif qilmoqda.

Musobada qatnashish yoshi 6-20 yosh qilib belgilangan. O‘z yosh toifasi bo‘yicha O‘zbekiston chempionatida ishtirok etgan barcha yoshlar ushbu musobaqada qatnashishlari mumkin.

G‘arbiy Osiyo chempionatining tashkiliy qo‘mitasi rasmiy ma`lumotiga ko‘ra, asosiy ishtirokchilar 10 avgustgacha 75$ (o‘z yosh toifasida O‘zbekiston chempionatida g‘oliblikni qo‘lga kiritganlar), qo‘shimcha ishtirokchilar 150$ miqdoridagi mablag‘ni tashkiliy qo‘mitaga to‘lashi belgilangan. Ushbu sanadan keyin kechikkan ishtirokchilar har bir rasmiy o‘yinchi uchun asosiy o‘yinchilar 125 $ va qo‘shimcha o‘yinchi uchun 200$ miqdoridagi mablag‘ni to‘lashiga to‘g‘ri keladi. 3 mahal ovqat hamda turar joyga 1 kunga 1 kishilik xona uchun 90$, ikki kishilik xona (har bir kishi) uchun 50$ miqdoridagi summani tashkil qiladi. Transfer harajatlari (Indira Gandi nomidagi xalqaro aeroport – Tivoli Grand Resort Hotel – Indira Gandi nomidagi xalqaro aeroport) 100$ni tashkil qiladi.

Musobaqaga borib kelish harajatlari ishtirokilar tomonidan qoplanadi.

O‘zbekiston Shaxmat federasiyasi Matbuot xizmatining xabariga ko‘ra, musobaqada qatnashish istagi bo‘lgan shaxmatchilar arizalarni O‘zbekiston Shaxmat federasiyasiga topshirishlari talab etiladi.

Sirli Hindistonda bo‘ladigan, G‘arbiy Osiyo chempionatida qatnashish uchun ro‘yhatdan o‘tish muddati 1 avgustgacha. Turnir so‘nggida 7 mo‘jizadan biri hisoblanadigan Toj-Mahalga sayohat ham uyushtiriladi.

Eslatib o‘tamiz, o‘tgan yilgi G‘arbiy Osiyo chempionati Toshkent shahrida o‘tkazilib, unda terma jamoamiz umumjamoa hisobida birinchi o‘rinni egallagandi.