1-20 avgust kunlari O‘zbekiston futbol assosiasiyasi huzuridagi hududiy bolalar-o‘smirlar futbol akademiyalariga qabul imtihonlarining hal qiluvchi ikkinchi bosqichi o‘tkaziladi.

Bugun O‘FA majlislar zalida mazkur imtihonlarni yuqori darajada, shaffoflik va adolat tamoyillariga asoslangan holda tashkil etish masalalariga bag‘ishlangan yig‘ilish bo‘lib o‘tdi. Unda hududiy bolalar-o‘smirlar futbol akademiyalari direktorlari hamda imtihonda bevosita vakil sifatida qatnashadigan O‘FA xodimlari ishtirok etishdi.

Qayd etish joiz, hududiy akademiyalarga qabulning ilk bosqichi iyul oyida tashkil etildi va unda 2008 yilda tavallud topgan futbolchilar ichidan eng yaxshilari saralandi. Ana endi avgustda bo‘ladigan yakuniy imtihonlarda har bir akademiyaga 22 nafardan iqtidorli o‘yinchilar tanlab olinadi. Yakuniy imtihonlar 4 kun davom etib, dastlab o‘yin amaliyoti va mantiqiy test bo‘yicha bilim va ko‘nikmalar tekshiriladi. Keyin esa texnik va jismoniy qobiliyatlar sinovdan o‘tkaziladi va akademiyada tahsil oluvchi bolalar saralab olinadi.

Bugun bo‘lib o‘tgan yig‘ilishda imtihonlarning yuqori darajada tashkil etilishi, yakunda esa iqtidor bobida eng sara futbolchilar tanlab olinishida e’tibor qaratilishi lozim bo‘lgan jihatlar muhokama etildi.

Yig‘ilishda ishtirok etgan O‘FA Birinchi vise-prezidenti Ravshan Ermatov imtihonlar jarayonining adolatli tarzda tashkil etilishi juda ham muhim ekanini alohida ta’kidlab o‘tdi:

- Akademiyalarga qabul imtihonlarining asosiy me’zoni – adolatli tanlov bo‘lishi lozim. Hech qanday aralashuvlarsiz, faqat bolalarning iste’dodini professional tarzda baholash orqaligina biz hududiy bolalar-o‘smirlar futbol akademiyalarida eng iqtirdorli o‘yinchilarning tahsil olishini ta’minlashimiz mumkin bo‘ladi. Buning uchun esa imtihonni o‘tkazishga mas’ul bo‘lgan akademiya direktorlari, shuningdek imtihonlarda qatnashadigan O‘FA vakillaridan bor kuch-mahoratini ishga solish va imtihonlarni professional darajada o‘tkazish talab etiladi, - dedi Ravshan Ermatov.