Ertaga shonli klubimiz “Paxtakor-79”ning aviahalokatga uchraganiga roppa-rosa 40 yil to‘ladi. Futbolchilarimiz xotirasini abadiylashtirish, ularning nomlarini kelajak avlodga yetkazish borasida bu yil katta tadbir dasturlari ishlab chiqilgan. Bugun O‘zbekiston Superligasining 16-turidan o‘rin olgan “Paxtakor” – “Buxoro” uchrashuvidan avval mazkur tadbirlarga bag‘ishlangan matbuot-anjumani tashkil etildi. Unda Vasilis Xadzipanagis, Aleksandr Chivadze, Vladimir Gusayev kabi yaqin va uzoq o‘tmishdagi taniqli futbol yulduzlari, sport faxriylari va qator OAV ishtirok etdi.

Anjuman davomida o‘z davrining eng yorqin futbolchilari “Paxtakor-79”ning o‘ziga xos o‘yinlari, jamoa tarkibidagi yigitlarning qanchalik mohir futbolchi bo‘lgani va o‘sha davr futboli haqida xotirlab o‘tishdi.

“Shuni aytish kerakki, o‘sha “Paxtakor”da yosh yigitlar o‘ynardi. Halokatga uchragan jamoa tarkibida do‘stlarimiz, yosh yulduzlar bo‘lishgan. Ularni yo‘qotish biz uchun fojea. Halokatdan so‘ng yangi “Paxtakor”ga qarshi Toshkentdagi ilk o‘yindan oldin qabristonga borib bizni tark etgan yaqinlarimizni xotirlab keldik. O‘yinda esa stadion to‘la odam. Sodiq muxlislar eski jamoasini ko‘rgani kelgandek edi. Biz "Paxtakor"ning bunday yigitlarini unutmaymiz”, – dedi Aleksandr Chivadze.

“Jamoa halokatga uchragandan keyin turli klublardan yangi futbolchilar keldi. Ammo ikkala tarkib umuman boshqa maktab tarbiyalanuvchilari ekani yaqqol sezilardi. Biz yo‘qotgan jamoa o‘z o‘yin uslubi, jamoaviy o‘yini bilan ajralib turgan”, – dedi Vladimir Gusayev.

Ertaga “Paxtakor” stadionida o‘rnatilgan yodgorlik yonida va Botkin qabristonida xotira tadbirlari o‘tkazilsa, 20:00 da “Paxtakor” va Sobiq Ittifoqning faxriy futbolchilari ishtirokida o‘rtoqlik uchrashuvi bo‘lib o‘tadi.