Tokioda start olgan jahon chempionatining birinchi kuni terma jamoamiz uchun muvaffaqiyatli o‘tmoqda. Biroz avval musobaqaning kechki dasturida medallar uchun kurashuvchi sportchilar nomi ma’lum bo‘ldi.
E’tiborlisi, -60 kilogramm vazn toifasida yurtimiz sharafini himoya qilayotgan Sharofiddin Lutfillayev jahon chempionatining yarim finaliga yo‘l oldi. Vakilimiz uchinchi bosqichda avstraliyalik Joshua Kasni, chorak finalda esa 3 karra va amaldagi jahon chempioni yaponiyalik Naoxisa Takatoni mag‘lub etishning uddasidan chiqdi. Hamyurtimiz finalga chiqish uchun qozog‘istonlik Gusman Kirgizbayevga qarshi tatamiga chiqadi.
Yana bir jihati Lutfillayev faoliyatida ilk bor yaponiyalik raqiblaridan ustun kelmoqda va ilk bor JCHning yarim finaliga yo‘l oldi. Afsuski, Diyorbek O‘rozboyev to‘rtinchi davrada Xitoy Taipeyi vakiliga imkoniyatni boy berib, medallar uchun kurashni erta tark etdi. Chempionlik yo‘lida Sharofiddin Lutfillayevga omad tilab qolamiz.
