«An-Nasr» 2019 yildan buyon ilk marotaba Saudiya Arabistoni chempioniga aylandi. Jamoa Pro-ligada «Al-Hilol» klubini ikki ochkoga (86 ga qarshi 84) ortda qoldirgan holda birinchi o‘rinni egalladi. Yulduz Krishtianu Ronaldu uchun bu «An-Nasr» safidagi ilk chempionlik tituli bo‘ldi.
Chempionatning «Damak»ka qarshi kechgan so‘nggi uchrashuvidan ko‘p o‘tmay, 41 yoshli futbolchi ijtimoiy tarmoqlardagi sahifasiga yangi post joylashtirdi.
«Chempionlar!» — deb yozdi Ronaldu o‘z suratlari jamlanmasi ostiga. Suratlarning birida u qo‘lida bosh sovrinni tutib turganini ko‘rish mumkin.
Krishtianu Ronaldu «Damak»ka qarshi bahsda dubl qayd etdi. Portugaliyalik yulduz 2023 yilning boshidan buyon «An-Nasr» sharafini himoya qilib kelmoqda. Eslatib o‘tamiz, avvalroq Ronaldu Portugaliya terma jamoasining JCH-2026 uchun yakuniy qaydnomasiga kiritilgan edi.
