«Ан-Наср» 2019 йилдан буён илк маротаба Саудия Арабистони чемпионига айланди. Жамоа Про-лигада «Ал-Ҳилол» клубини икки очкога (86 га қарши 84) ортда қолдирган ҳолда биринчи ўринни эгаллади. Юлдуз Криштиану Роналду учун бу «Ан-Наср» сафидаги илк чемпионлик титули бўлди.
Чемпионатнинг «Дамак»ка қарши кечган сўнгги учрашувидан кўп ўтмай, 41 ёшли футболчи ижтимоий тармоқлардаги саҳифасига янги пост жойлаштирди.
«Чемпионлар!» — деб ёзди Роналду ўз суратлари жамланмаси остига. Суратларнинг бирида у қўлида бош совринни тутиб турганини кўриш мумкин.
Криштиану Роналду «Дамак»ка қарши баҳсда дубль қайд этди. Португалиялик юлдуз 2023 йилнинг бошидан буён «Ан-Наср» шарафини ҳимоя қилиб келмоқда. Эслатиб ўтамиз, аввалроқ Роналду Португалия терма жамоасининг ЖЧ-2026 учун якуний қайдномасига киритилган эди.
