Ispaniya chempionatining 6-turi doirasida «Barselona» o‘z uyida «Vilyarreal»ni qabul qildi. Lionel Messi ushbu mavsumda ilk marotaba "ko‘k-anorranglilar" safida o‘yinni boshlang‘ich tarkibda boshladi.

Mezbonlar o‘yinni ancha faol boshlashdi va 6-daqiqada argentinalik futbolchining burchakdan yetkazgan uzatmasidan so‘ng hisob ochildi. Grizmann bosh bilan darvozani ishg‘ol qildi.

Oradan ko‘p o‘tmasdan, kutilmaganda Artur olis masofadan kuchli zarba yo‘llab, chiroyli gol muallifiga aylandi.

Birinchi bo‘lim tugash arafasida Santi Kasorla ham olis masofadan zarba yo‘llab, ter Shtegenni dog‘da qoldirdi.

Ikkinchi bo‘lim boshida Messi o‘rniga jarohatidan forig‘ bo‘lgan Usmon Dembele tushirildi. Murabbiylar shtabi Lionelni ehtiyot qilishga qaror qilishdi. Ikkinchi 45 daqiqalikda ustunlik maydon egalari tomonida bo‘lgan bo‘lsa, "sariq suvosti kemasi" qarshi hujumda harakat qildi. Ammo jamoalarga gol urish boshqa nasib qilmadi.

Shu tariqa, "Barselona" o‘z ochkolarini 10taga yetkazib, jadvalda 4-o‘ringa ko‘tarilib oldi.

Ispaniya La ligasi, 6-tur
Barselona – Vilyarreal 2:1 (2:1, 0:0)
Gollar: 1:0 – 6 Grizmann, 2:0 – 15 Artur, 2:1 – 44 Kasorla.
Barselona – ter Stegen, Semedu, Pike, Langle, Firpo, Serji Roberto (de Yong, 63), Buskets, Artur, Messi (Dembele, 46), Suares (Fati, 78), Grizmann.
Vilyarreal – Asenxo, Penya, Albiol, Pau Torres, Kintilya, Zambo-Angissa, Iborra, Chukvueze, Kasorla (Bakka, 77), Ontiveros (Toko-Ekambi, 57), Jerar Moreno (Moyses Gomes, 68).
Ogohlantirishlar: Serji Roberto (26), Grizmann (47), Zambo-Angissa (72), Albiol (81), Firpo (82), Buskets (90).