Superliga 21-turida jamoamiz Toshkentda "So‘g‘diyona"ni qabul qiladi.

Allaqachon chempionlikka erishib bo‘lgan "Sherlar" muxlislarni chiroyli futbol bilan xursand etishga urinishadi. Jizzaxliklarda esa Chempionlar Ligasiga chiqish imkoniyati mavjud. Shu sababli bahsning qiziqarli va keskin kechishiga shubha yo‘q. Jamoalar safida diskvalifikasiya bilan bog‘liq yo‘qotishlar mavjud emas.

Milliy chempionatlar doirasida o‘zaro 47 uchrashuv bo‘lib o‘tgan. 39 bellashuvda jamoamiz g‘alabaga erishgan bo‘lsa, 4tadan o‘yinda durang va raqibning g‘alabasi qayd etilgan. 120 gol urgan "Sherlar" o‘z darvozasidan 38 to‘p o‘tkazib yuborishgan. "Paxtakor"ning eng yirik g‘alabalari 6:1 va 5:0 hisoblarida kuzatilgan. Toshkentdagi 23 bahsning 21tasida jamoamiz muvaffaqiyatini nishonlagan. Faqat bir martadan jizzaxliklar yutug‘i va durang qayd etilgan. 1995 yildan beri "So‘g‘diyona" safar o‘yinlarida ochko olmagan.

O‘yinga tashrif buyuradigan muxlislar chempionlik nishonlanishiga atalgan ajoyib kechaga guvoh bo‘lishlari mumkin. Ishqibozlarning nafaqat qiziqarli futbol, balki chempionlikning chiroyli bayram qilinishidan bahramand bo‘lishlarini istaymiz.

Bellashuv yakuniga yetgach, stadionda lazer shou tashkil etiladi. Bundan tashqari, milliy estrada yulduzlari ishtirokida konsert dasturi, qimmatbaho sovg‘alar qo‘yilgan ijtimoiy aksiya va eng muhim tadbir - chempionlik kubogini topshirish marosimi bo‘lib o‘tadi.

Biz futbol bayramida barcha muxlislarni kutib qolamiz. "Paxtakor" - "So‘g‘diyona" bellashuvi 1 oktyabr, seshanba kuni "Paxtakor" stadionida soat 17:00da boshlanadi.