Kelasi yilning yanvar oyida Tailandda U-23 Osiyo chempionati final bosqichi bo‘lib o‘tadi. Olimpiada yo‘llanmasini qo‘lga kiritish maqsadida bo‘lgan O‘zbekiston olimpiya terma jamoasi mazkur musobaqaga jiddiy hozirlik jarayonini davom ettirmoqda.

Bugun erta tongda Lyubinko Drulovich boshqaruvidagi olimpiyachilarimiz Toshkent – Inchxon yo‘nalishi bilan Janubiy Koreyaga yetib keldi va Xvason shahridagi “Rumir” mehmonxonasiga joylashdi. Tushdan so‘ng esa Janubiy Koreya olimpiya terma jamoasi bilan bo‘ladigan ilk o‘yin o‘tkaziluvchi “Hwaseong Sports Complex” arenasi maydonida mashg‘ulot o‘tkazildi.

Ertaga esa ilk o‘yin oldidan rasmiy mashg‘ulot hamda o‘yinoldi matbuot anjumani o‘tkaziladi.

Ta’kidlash joiz, Janubiy Koreya – O‘zbekiston olimpiya terma jamoalari o‘rtasidagi ilk uchrashuv 11 oktyabr kuni “Hwaseong Sports Complex” arenasida bo‘lib o‘tadi. O‘yin mahalliy vaqt bilan 20:35da, Toshkent vaqti bilan esa soat 16:35da boshlanadi. Uchrashuv Koreyaning KBS telekanali tomonidan jonli efirda namoyish etiladi.