22-tur doirasida bo‘lib o‘tgan "Nasaf"-"Andijon" jamoalari o‘rtasidagi uchrashuvdan keyingi o‘tkazilgan matbuot anjumanida "Andijon" jamoasi bosh murabbiyi Aleksandr Xomyakov o‘yin haqidagi fikrlar bilan o‘rtoqlashdi
- Albatta, xafaman. O‘zbekiston Kubogi bahsida ham, bugun ham o‘z darvozamiz dahlsizligini saqlab qola olmadik. Ikkita standart vaziyatdan gol o‘tkazib yubordik. Himoyaga ko‘proq urg‘u qaratgan edik. Lekin, nafaqat himoya, balki boshqa chiziqlarda ham sustkashlikka yo‘l qo‘ydik. O‘yin mobaynida ko‘proq himoyalandik. Aytarli bitta ham golga tortadigan vaziyat sodir eta olmadik. Shu boisdan, "Nasaf" haqli g‘alabaga erishdi deb bemalol ayta olaman.
- "Andijon" jamoasi oldiga qanday vazifa qo‘yilgan?
- Oldimizga yuqoriroq o‘rinni egallash vazifasi qo‘yilgan. Oldimizda 4 ta uchrashuv bor va o‘sha uchrashuvlarning barchasini o‘z maydonimizda o‘tkazamiz. FIFA kunlaridagi dam olishlar bizning zararimizga ishladi.
- Jamoa tarkibidan ko‘nglizni to‘qmi?
- Birinchi davradagi tarkibni aytarli o‘zgartirmadik. Birinchi davrada qanday tarkib to‘p surgan bo‘lsa, hozir ham deyarli o‘sha futbolchilar to‘p surishmoqda.
- "Nasaf" jamoasi bilan Liga Kubogida ham bahs olib borgansizlar. O‘sha paytdagi jamoa bilan hozirgi "Nasaf"da qandaydir o‘zgarish bormi?
- "Nasaf" jamoasini qanday o‘yin namoyish etishini bilamiz. "Nasaf" jamoaning kuchli va kuchsiz taraflarini bilamiz. Shu boisdan ularning qanotdan hujum uyushtirishiga qarshilik ko‘rsatishimiz kerak edi. Qolaversa, qarshi hujumga ham juda xavfli o‘tadi. Shu bois maydon markazida o‘ynashga qaror qilgandi, hujumlarini qaytarish uchun. Biroq, biz o‘ylagan reja amalga oshmadi.
- Shahzod Ubaydullayev "Dinamo" jamoasiga ham, "Surxon" jamoasiga ham gol kiritgandi. Bugun esa yorqin o‘yin namoyish eta olmadi.
- Afsuski, bugun uning o‘yini chiqmadi. Hujumchi gol urish uchun yarim himoya vakillari vaziyat bilan ta’minlab turish kerak. Lekin, bugun unday bo‘lmadi. Bugun nafaqat Ubaydullayev, balki, butun jamoa yaxshi o‘yin namoyish etmadi.
- "Andijon" jamoasida sharoitlar va vazifalar qanaqa?
- Har bir uchrashuvda jozibador o‘yin namoyish etishga harakat qilamiz. Chiroyli o‘yinlar orqali g‘alabaga erishib, muxlislarimizni xursand qilish asosiy maqsadimiz. Andijonda futbolni sevishadi. Muxlislar doim biz bilan birga. Shu bois, ularni xursand qilishga majburmiz!
- Jamoangiz qolgan to‘rtta uchrashuvni uyda o‘tkazadi. Bu jamoaga qo‘l kelsa kerak?
- Shunga umid qilaman. Ikkita uchrashuv o‘tkazganimizdan keyin terma jamoa o‘yini sababli yana tanaffus yuzaga keladi. O‘sha yuzaga kelgan tanaffusdan ham unumli foydalanib, qolgan ikki turda ham ijoyib natija qayd etishimiz kerak.
