Xabaringiz bor, 23-25 oktyabr kunlari Eronning Urmiya shahrida futzal bo‘yicha Osiyo chempionati-2020ning saralash bahslari bo‘lib o‘tadi.

O‘zbekiston milliy terma jamoasi Markaziy va Janubiy mintaqaning “A” guruhidan o‘rin olgan bo‘lib, terma jamoamizga guruhda Tojikiston, Nepal va Afg‘oniston raqiblik qiladi.

Bugun, 22 oktyabr kuni saralash bahslari oldidan jamoalar rasmiylari, musobaqa tashkilotchilari, uchrashuvlarda komissar va nazoratchi sifatida faoliyat olib boruvchi mas’ullar ishtirokida yig‘ilish bo‘lib o‘tdi. Unda saralash doirasidan o‘rin olgan uchrashuvlar tashkiliy masalalari muhokama etildi. Shuningdek, jamoalarning uchrashuvlarni qanday liboslarda o‘tkazishi masalasiga aniqlik kiritildi.

Bilasiz, O‘zbekiston milliy terma jamoasi ilk uchrashuvini ertaga, 23 oktyabr kuni Afg‘onistonga qarshi o‘tkazadi. Mazkur uchrashuvni vakillarimiz oq rangdagi sport formalarida o‘tkazishadi. Raqib esa qizil rangli libos kiyadi.

Ta’kidlash joiz, O‘zbekiston – Afg‘oniston uchrashuvi ertaga mahalliy vaqt bilan soat 15:30da, Toshkent vaqti bilan esa 17:00da start oladi.