Buxoroda bo‘lib o‘tgan "Buxoro" - AGMK uchrashuvidan keyin olmaliqliklar yordamchi murabbiyi Xayrulla Karimov o‘z fikrlari bilan o‘rtoqlashdi.

"O‘yin kurashlarga boy tarzda kechdi. Har ikkala jamoa ochko zarur edi. "Buxoro" elitada qolish uchun kurashgan bo‘lsa, bizga mavsumni kuchli oltilikka yakunlash imkoni bor edi. Shu boisdan faqat g‘alabani ko‘zlagandik. Shuningdek, chempionat doirasida mavsumni yaxshi kayfiyatda yakunlab, finalda ko‘tarinki ruhda bormoqchi edik. Futbolchilar yaxshi harakat qilishdi. Mavsum uchun futbolchilarga rahmat aytamiz. Garchi chempionat tugagan bo‘lsada, oldimizda Liga kubogi finali turibdi. Biz bilan doim birga bo‘lib, har doim qo‘llab-quvvatlab turgan muxlislarga katta rahmat. AGMK uchun mavsumning yakuniy qismiga aylanadigan finalga taraddud ko‘ramiz", — dedi Karimov.