Bilasiz, milliy chempionatimiz uchrashuvlariga muxlislar qiziqishini orttirish, stadionlarga muxlislar tashrifini ko‘paytirish, ishqibozlar o‘rtasida muxlislik madaniyatini yanada rivojlantirish bo‘yicha qator sa’yi-harakatlar amalga oshirilmoqda.

Bugun Namangan shahrida futbol ishqibozlari bilan uchrashuv tashkil etildi. Unda Jismoniy tarbiya va sport vazirining birinchi o‘rinbosari, O‘FA birinchi vise-prezidenti Ravshan Ermatov, O‘zbekiston milliy terma jamoasi bosh murabbiyi Vadim Abramov hamda terma jamoamiz sardori Odil Ahmedov ishtirok etdi.

Samimiy va ochiq ruhda o‘tgan uchrashuv davomida o‘zbek futbolining kechasi va buguni, mavjud kamchilik hamda muammolar, qo‘lga kiritilayotgan yutuqlar, ishqibozlarni qiynayotgan masalalar, milliy futbolimizning yaqin kelajak rejalari muhokama etildi.

Ochiq muloqot davomida ishqibozlar o‘zlarini qiziqtirgan savollar bilan murojaat qilishdi, milliy futbolimizni rivoji uchun o‘z taklif hamda mulohazalarini bildirishdi.

Milliy terma jamoamiz ustozi Vadim Abramov Namanganda “millionlar o‘yini”ning ashaddiy ishqibozlari juda ham ko‘p ekanini ta’kidlab, turli yoshdagi terma jamoalarimizning o‘yinlari Namangan shahrida ham o‘tkazilishidan mamnun bo‘lishini bildirdi. Odil Ahmedov esa milliy jamoa safida maydonga tushadigan har bir futbolchi xalqimiz oldidagi mas’uliyatini chuqur his etishini, yigitlar har bir uchrashuvda muxlislarni xushnud etish uchun bor kuch-mahoratlarini ishga solishlarini aytib o‘tdi.

O‘z navbatida Ravshan Ermatov muxlislar bilan bu kabi samimiy muloqotlar tez-tez o‘tkazib borilishini ta’kidladi va O‘FA milliy futbolimiz ravnaqi yo‘lida ishqibozlarning takliflarini eshitishga hamisha tayyorligini bildirdi.