La ligi prezidenti Xavyer Tebas koronavirus pandemiyasi Ispaniya chempionatiga qay tarzda ta’sir ko‘rsatayotgani haqida o‘z fikrini bildirib o‘tdi.

«Hozir biz tuzilgan shartnomalardagi majburiyatimizni qanday qilib bajarish haqida o‘ylayapmiz. Butun jahon bo‘ylab translyasiya borasida 100ga yaqin shartnoma imzolaganmiz. Agar translyasiya bo‘lmasa, pul ham bo‘lmaydi.

Iqtisodiy zarbani yumshatish uchun taqvim ustida ishlayapmiz. Bu muammo nafaqat kichik klublar uchun, balki Yevropaning katta klublari uchun ham jiddiy muammo. Musobaqalarning ko‘chirilishi daromadning kamayib ketishiga olib keladi.

Agar mavsum oxiriga yetkazilmasa, bu barcha klublarning byudjetiga ta’sir ko‘rsatadi. Ammo ishonchim komil, mavsumni oxiriga yetkazamiz. Agar Yevro-2020 o‘tkazilmasa, mavsum qay tariqa yakunlash haqida o‘ylayapmiz. Aks holda, biz jiddiy muammolarga duch kelamiz.

Albatta, sog‘liq birinchi darajali masala, lekin iqtisodiy strukturani ushlab qolish ham juda muhim.

Hozirgi paytda men Italiya va Germaniya chempionati bilan ham aloqada bo‘lib turibman. Rejamiz shunday: avval seshanba kuni Yevro-2020 borasida qanday qaror qabul qilinadi. Shundan so‘ng o‘z chempionatimizni hal qilamiz», – dedi Tebas.