Belarus chempionatining 2-turiga start berildi. "Energetik-BGU" klubi  Brestning "Rux" klubi mehmoni bo‘lib, qiyin g‘alabani qo‘lga kiritdi.

O‘yin davomida ustunlik mezbonlar tomonida bo‘ldi. Ammo birinchi taym tugashiga 2 daqiqa qolganida mehmonlar hisobni ochishdi. Yaxshiboyev tomonidan burchakdan yetkazilgan uzatmani Danil Miroshnikov bosh bilan darvozaga joylab qo‘ydi. To‘p ustunga tegib, to‘rga borib tushdi.

Ikkinchi bo‘lim boshida Jasur o‘z hisobiga yana bitta "assist" yozishi mumkin edi. Uning zargarona uzatmasidan keyin Atemeng 2 metrdan darvozani zabt eta olmadi. To‘p hujumchining oyog‘iga tegmay qoldi. Darvozabon esa to‘pni qaytardi.

Yaxshiboyev 60-daqiqada zaxira olingan bo‘lsa, yana bir o‘zbekistonlik hujumchi Shahboz Umarov 73-daqiqada zaxiradan maydonga tushirildi. Ushbu futbolchi o‘yin so‘ngida o‘z hisobiga gol yozishi mumkin edi. Umarov bir himoyachini aldab o‘tib, jarima maydoni burchagidan olis burchak tomon zarba berdi. "Rux" posboni to‘pni maydon tashqarisiga chiqarib yubordi.

O‘yin davomida "Rux" futbolchilari bir qator imkoniyatlardan foydalana olmaganini ta’kidlash lozim. Jumladan, bir vaziyatda to‘p ustunga tegib qaytdi.

"Energetik-BGU" mavsumdagi ikkinchi g‘alabani qo‘lga kiritib, jadvalda peshqadamlikni saqlab qoldi.

Belarus chempionati, 2-tur
Rux Brest – Energetik-BGU 0:1 (0:1, 0:0)
Gol: 0:1 – 43 Miroshnikov.
Rux Brest – Nechayev, Gayduchik, Kolpachuk, Migunov, Kovtun, Vilyam, Tixonovskiy, Osuchukvu, Grechixo, Konsevoy, Petrenko.
Energetik-BGU – Lesko, Sokol, Shkurdyuk, Mavatu, Miroshnikov, Nosko, Yaxshiboyev (Bakich 60), Girs, Tve, Musaxanyan, Atemeng (Shahboz Umarov 73).