Ispaniya La ligasi koronavirusga qarshi kurash uchun xayriya konserti doirasida million yevrodan ko‘proq pul yig‘di.

28 mart, shanba kuni musiqashunoslar va futbolchilar uyda turib festivalda ishtirok etishdi. Internetning turli platformalari orqali uni dunyoning 182 mamlakatida 50 milliondan ortiq kishi tomosha qildi.

Shuningdek, ushbu aksiyada Santander Bank, Universal Music Group va GTS kompaniyalari ishtirok etishdi. Butun dunyodan odamlar ushbu tadbir uchun 1,003 mln yevro miqdorida xayriya qilishdi.

Tushgan mablag‘ Santander Bank jamg‘armasi orqali COVID-19ga qarshi kurash uchun kerakli vositalar xarid qilishga yo‘naltiriladi, jumladan:

– 115ta nafas berish uskunasi;

– 1,435 mln dona niqoblar;

– 12 595 dona himoya kostyumlari;

– 500 000 tibbiy qo‘lqoplar.

To‘rt soat davom etgan festivalda Serxio Ramos («Real»), Jerar Pike («Barselona»), Koke («Atletiko») va Xoakin («Betis») kabi futbolchilar ishtirok etishdi. Bundan tashqari, tennischi Rafael Nadal va suzuvchi Mireya Belmonte qatnashishdi.